| مجموعة أبوعمر تهتم بالشئون الإماراتية بشكل خاص والعالمية بشكل عام للإنضمام للمجموعة أرسل رسالة فاضية على |
|
ليصلك كل ما هو جديد
أشترك معنا بإرسال رسالة فارغة إلى الإميل التالي
abuoumar+subscribe@googlegroups.com
السلام عليكم ورحمة الله وبركاته
رجعت فيني الذاكره لنهاية السبعينات وبداية الثمانينات وتذكرت مسلسلات رمضان قبل وقعدت اقارن فيها مع مسلسلات هالوقت ياليتني ماتذكرت وتحسفت
كان في السابق ماكو لافضائيات ولاستلايت وبطقة دقمه وحده تشوف العالم كله فكان تلفزيون الكويت هو الوحيد اللي نشوفه ونقعد نطالعه غصب علينا لأنه ماكو غيره
كان تلفزيون الكويت يعمل في دورة رمضان تقريبا 3 اعمال طبعا اتكلم عن المسلسلات مو البرامج كان مسلسل واحد من 30 حلقه هذا يكون بعد الفطور على طول وكانت اغلب المسلسلات تكون من التراث الشعبي بصبغه كويتيه لكنها بالفعل جميله
والمسلسلين الباقين يقسمون على طول الشهر 15 حلقه بالنص الأول و15 حلقه للنصف الثاني من رمضان مو طواله عالفاضي نفس الحين يمططون ويطولون بالمسلسل على الفاضي كانوا يعطونا الزبده ومع السلامه
اذكر كانت هناك بعض المسلسلات العربيه والخليجيه اللي يشترونها تلفزيون الكويت للدوره الرمضانيه لكن ماراح اتطرق لها لانها مو موضوعي موضوعي هو الفرق بين مسلسلات قبل ومسلسلات الحين
كان في السابق الطابع الكوميدي هو السائد في ذاك الوقت .. كانوا يعلمونا على الصح والغلط والكل كان يستفيد الكبار قبل الصغار
كانوا الكبار هم اول من يجابلون التلفزيون قبل الصغار لمشاهدة المسلسلات الجميله في ذاك الوقت لانها فعلا كانت تجذب المشاهد
ودي ابدأ معاكم في هالمقطع الجميل اللي كنا نفرح لما نشوفه ونعرف ان رمضان 
عادت عليكم ياهلا .. ياهلا فيكم ياهلا
===========================================
ودي استعرض معاكم بعض المسلسلات حسب السنين وبالترتيب بالاعتماد على الذاكره اللي بدت تندثر 
اللي يبي منهم شي لايردكم الا لسانكم
وابدأها بمسلسل درب الزلق انتاج سنة 1974 .. طبعا ما اذكره لحظة عرضه لأني كنت صغير لكن من كثر ماكانوا يعيدونه ركز في الذاكره يعتبر اول مسلسل كويتي ملون وهو من اروع المسلسلات الكويتيه اللي لازال يشاهد
اويلي اويلي واويلاه
مسلسل حبابه سنة 1976 ايضا ما اذكره وقت عرضه لكن من اعاداته ركز في الذاكره ايضا وهو للفنانه الراحله مريم الغضبان ومحمد المنصور وهدى حسين والراحل غانم الصالح وحياة الفهد
ياحبابه يانور العين واصحابه ياحبابه
مسلسل الاقدار سنة 1977 ما اتذكره وقت عرضه ويعتبر من المسلسلات الكويتيه الرائعه واخليكم مع
مسلسل الابريق المكسور سنة 1978 هني كنت اذكر بعض المشاهد منه خصوصا اغنية البدايه .. باقوه باقوه تراهم باقوه .. وكان يعرض بعد الفطور مباشره من بطولة عبدالرحمن العقل , خالد العبيد , عبدالله الحبيل
مسلسل إلى أبي وأمي مع التحية - الجزء الأول 1979 من اجمل المسلسلات التربويه هني عاد بديت شوي اتذكر
مقدمة مسلسل الى ابي وامي مع التحيه
مذكرات جحا سنة 1979 وكان يعرض بعد الفطور لابراهيم الصلال وعبدالله الحبيل وخالد العبيد من المسلسلات الجميله
===========================================
ونروح لسنة 1980 وكان فيها مسلسلات جميله جدا صعبه تنمحي من الذاكره
منو مايتذكر مسلسل السيف المفقود اللي كان يطلع بعد الفطور مباشره واللزمه مالت علي المفيدي الله يرحمه صنقور أكال الارانب والطيور
ومسلسل العتاويه اللي كان يطلع بعد الاخبار مال عبدالحسين عبدالرضا
ومسلسل خرج ولم يعد في النصف الثاني من شهر رمضان من نفس العام 1980 للمرحوم باذن الله تعالى غانم الصالح وحياة الفهد وسعاد عبدالله
ويابو الريش هدا هدا يابو الريش هدا
===========================================
واوديكم الحين لسنة 1981
وبدايتها مع مسلسل علاء الدين اللي كان بعد الفطور يطلع ..
ومع مسلسلات بعد الاخبار الأول درس خصوصي للفنان القدير الله يطول بعمره عبدالحسين عبدالرضا وسعاد عبدالله وحياة الفهد و المسلسل الثاني في النصف الثاني من رمضان كان أبله منيره
اخليكم مع بعض المقاطع للعملين
اللي من قوة الدعمه طلعوا نمرة الباص من خاصرتي 994
وهذا مشهد من مسلسل ابله منيره للفنان الراحل خالد النفيسي وعبدالرحمن العقل وهدى حسين ..
والبنات البنات والبنين لاشمال ولاوراي ولايمين والسقوط اصبح يجينا كل شهر
===========================================
ونروح لسنة 1982 ونشوف مسلسل بدر الزمان لخالد العبيد (شركان شركون) ومحمد جابر وهدى حسين وابراهيم الحربي وعبدالرحمن العقل
ومسلسل الى ابي وامي مع التحيه الجزء الثاني اللي كان يطلع بعد الاخبار
وفي سنة 1983 كان الموسم الاول لفوازير فطوطه سمير غانم اضغطوا هني وشوفوا المقدمه
وكان هناك مسلسلين انعرضوا في رمضان بعد الاخبار الاول خالتي قماشه وما اعتقد مافي احد مايعرف هالمسلسل من بطولة نجوم الفن الكويتي حياة الفهد وسعاد عبدالله ومريم الصالح الله يطول باعمارهم والراحلين خالد النفيسي وغانم الصالح وعلي المفيدي ومريم الغضبان وخليل اسماعيل عسى الله يرحمهم ويغفر لهم جميعا
والمسلسل الثاني كان مسلسل الاسوار تجدونه هنا
===========================================
سنة 1984 كانت سنه حافله بالمسلسلات والبرامج
نذكر منها فايز التوش في موسمه الاول وفوازير فطوطه في موسمه الثاني والجزء الثاني من البرنامج التعليمي افتح ياسمسم واللي كان جزئه الاول عام 1979
وفي هالسنه انعرض المسلسل الرائع اللي كان يعرض بعد الفطور الغرباء من بطولة غانم الصالح وميعاد عواد وحياة الفهد وعبدالرحمن العقل
مقدمة مسلسل الغرباء كانت مدينتنا ذهب
===========================================
والحين بستعرض معاكم بعض المسلسلات على السريع من سنة 1985 وانتوا رايحين
رقيه وسبيكه 1986 - كانوا رقيه وسبيجه خوش بنات
مسلسل أبو الفلوس 1987 - غانم الصالح
مسلسل على الدنيا السلام - مبروكه ومحظوظه 1987 - هذي مقدمة المسلسل
مسلسل مدينة الرياح 1988 - علقم علقم مر ومدلقم
مسلسل الطماعون 1989 - انا طباق طبق انا احسن من حدق
هذي كانت بعض المسلسلات القديمه اللي ذكرتها وحسيت بحنين كبير لها وقلت الله يالفرق بين مسلسلات قبل اللي كان لها اهداف كثيره في العمل الواحد الحين للاسف مانشوف الا طقني واطقك وطراقات وخيانات وبجي وقتلى وجرحى بيه شصاير شصاير
يبا ضحكوا للدنيا تضحك لكم ملينا والله من المسلسلات اللي بس مستنده على الالام والاحزان والبجي والطراقات ياليت نشوف شي من ريحة الماضي الجميل
__._,_.___
ليست هناك تعليقات:
إرسال تعليق